Luke 7

Piatooronuka~ Tarenara Bakaang Botovotonaaꞌ Jiisuuꞌke Taare-antavuuꞌnaꞌ

(Mat 8:5-13)

1Tenang Jiisuuꞌke bakaang daankinang bakearara taaravauꞌnooꞌketa tumparuꞌnung tee Kapaneumeꞌnavuntuꞌkoo. 2Teke tee naning narung daakuꞌ piatooronuka tarenara otokoꞌ bakaang botovotonaaꞌ teie aaꞌnaꞌ piaavukoꞌnung siipavouꞌnung booꞌkoo tumpituumpi. 3Tenang teie Jiisuuꞌ taaravura Juꞌkoong Ovontung botovuruꞌ tee-anko niaꞌaako pora taare-antavuuꞌnaang bakaang botovotonaaꞌ. 4Eeꞌnoko tenang teing Jiisuuꞌanko porora teing aaꞌnaꞌ eentavariruꞌnung aaꞌpaama, 5“Tee tee naning tampara aung, dake paku-koo makosi, aiꞌ teie tee niiꞌ Juꞌnupoong pakumurimaung eeꞌnoko niikaang dootuuꞌnava kanimemuruꞌ.”

6Eeꞌnoko Jiisuuꞌ teing ninka nariꞌ beuꞌ. Tenang tee pava dueꞌ basiarako teie daakuꞌ tarenarai baꞌmaikoriꞌ niiꞌning botovuruꞌ Jiisuuꞌanko aaꞌpuma, “Ovoring, daka baruꞌ poreꞌantararavaukaꞌ, aiꞌ ning tee makosi deeaꞌ daꞌ nkanooꞌ pava-koo kuung poꞌkoo. 7Teeꞌkoo ning ninka daangamarama daꞌanko moaꞌ, teka dake tamung karai minkueko nkaang botovotonaaꞌ taarevoaing. 8Ninge daꞌ pankaing tasiꞌdamira teeꞌ minkuamaang, aiꞌ ning tee napoꞌ niiꞌnooꞌ basi-koo iriꞌkoo kuung oꞌnong piatooronuka tare-koong-koo. Eeꞌnoko niiꞌnung aaꞌpanko dei, ‘Beai,’ tee bepeuꞌ. Eeꞌnoko niiꞌnung aaꞌpanko dei, ‘Poai,’ tee popeuꞌ. Eeꞌnoko nkaang botovotonaaꞌ aaꞌpanko, ‘Aung nkoveai,’ teie nkovupeuꞌ tee.”

9Tenang Jiisuuꞌke teeꞌ taaravura taꞌninuuꞌ tee-koo, eeꞌnoko damaꞌdu bereꞌarara karikaꞌkoo siompaakoꞌning-koo karoma aaꞌpuuꞌ, “Ninge naurampimang diiꞌ: temuꞌketa aung amuriiꞌ baito pankaing ooampaung bane Isireeli-nupoong ninka nariꞌ oꞌnorimaunge.” 10Eeꞌnoko tenang teing botovuruꞌning toroarira pava-koo teinge ooauꞌnung tee botovotonaaꞌ taarevora otoko.

Jiisuuꞌke Naaro Bauring Booꞌketa Daaꞌantavuuꞌnaꞌ

11Batei okiꞌnamuꞌkoo teketaꞌ Jiisuuꞌ niiꞌnamono-koo osi pankaing-koo beuꞌnung Neiniꞌ tampaamanamono-koo. Eeꞌnoko bakaning barevare-nupoong eeꞌnoko nantoong karinga nariꞌ tee ninka berouꞌnunge. 12Osi-koo karanaang dueꞌarako naning booꞌparuꞌnung nkavai siarikoꞌ temono-ita. Aung tee bauring narung masikung anie baukoi, eeꞌnoko teni teie bauko naaro. Eeꞌnoko nantoong karinga teni ninka nariꞌ porokoꞌ. 13Eeꞌnoko tenang Ovoringe oovura bakaang domang aaꞌnaꞌ piaavouꞌ teni-koo, eeꞌnoko aaꞌpuuꞌ, “Birontaravaukaꞌ.” 14Eeꞌnoko teie pora kompuuꞌ tee kave, eeꞌnoko teing nkavaakoꞌning dantavarira donkonai otorouꞌ. Eeꞌnoko teie aaꞌpuuꞌ, “Nemaka, ninge aaꞌdamaang daꞌ, ‘Daaꞌdaravai.’” 15Eeꞌnoko tee naning booꞌ deto baꞌnanura kara tutumparuꞌ, eeꞌnoko Jiisuuꞌke tee teni bauko avuuꞌ.

16Avoroꞌke amporoꞌuruꞌ teing ookara. Eeꞌnoko teinge Kumponing daangampauꞌ aaꞌpaama, “Nakaronara Kumponing-etaing niiꞌkoo meuꞌke anke daaꞌaring; Kumponinge niiꞌ bakaning beeroꞌmuring!” 17Eeꞌnoko teie aunge doorenange tee-koonge ookara Judiaꞌnavaro punkaraampuuꞌnung eeꞌnoko teꞌ korovui otoinairu nariꞌ.

Jiisuuꞌnaanka Jooni Minkinara Minkuaresi Otoinaꞌ

(Mat 11:2-19)

18Emuꞌ tee, Jooni Minkinara kiimatanava-koo otoko bakaning barevare-nupoong tee-anko berora nauauꞌnung aing ookara kapooꞌnanka Jiisuuꞌke nkovukoꞌning. 19Eeꞌnoko Joonie kenaankara bakaning-koo barevare-nupoong-koo bokuvureta Ovoring-anko botovuretuꞌnung aaꞌpuma, “Aaꞌpereai, ‘Daꞌ ee tee tavoꞌkuaing-koong, aiꞌ mmeꞌ niiꞌnung nempampiainge?’”

20Eeꞌnoko tenang tenaanka poreta tee-anko aaꞌpuretuꞌnung, “Jooni Minkinarai neeꞌ daꞌanko botomuresinung aaꞌpuma: ‘Daꞌ ee tee tavoꞌaravaing-koong, aiꞌ mmeꞌ niiꞌnung nempampiainge?’” 21Eeꞌnoko tenaankai Joonie botovuretuꞌnaankai makuꞌnooꞌ nempuresi otoko Jiisuuꞌke karinga amutemuriiꞌ siipa-poꞌnupoong taare-antavuruꞌ, niiꞌning oramuriiꞌ siipa avoꞌavoroꞌ otoroining eeꞌnoko niiꞌning tanuaananka oreng-poꞌnupoong. Eeꞌnoko kaputuꞌnuka mmauꞌ bantang-antavuruꞌnunge. 22Eeꞌnoko teie aaꞌpuretuꞌnung tenaanka, “Bereta nauereai tee Jooni Minkinara kapooꞌ deeꞌke ooveresining eeꞌnoko taaraveresining, aaꞌnoining: kaputuꞌnuka banteaama ookai, kauꞌ deꞌdoonuka nanai, oramuuꞌpoꞌnupoong kiiroraaꞌariri eeꞌnoko kipaunuka taareai, booꞌnuka daaꞌariri, ataꞌoinku tampara doorenang daankianko taaravai. 23Eeꞌnoko biraankearavaing tee naning ning-koo dateꞌpari baitoaravaing, eeꞌnoko nkaang nko-nko akoveeꞌ mareꞌuaukaꞌ.”

24Tenang Jooni Minkinara bakanaanka kara nkara toroaresioꞌ Jiisuuꞌke kara-nau tutumpuruꞌ nantoong karinga Jooni minkuvuma; eeꞌnoko aaꞌpuuꞌ, “Diiꞌke aremuriiꞌ naning doore taaraverira meeꞌboraꞌ sirakamaaꞌkoo ooveriiꞌnaang berikoꞌ karikaꞌduri? Naning tunsi-paaka onou avitoitoi eeari otoꞌ oo-koo teꞌ beriarupeuꞌ, apeꞌ? 25Napoꞌ naning nepuꞌarama kirokaiari otomaung oo-koo beriaꞌ, apeꞌ aing? Aiꞌ teing nantoong baarong tampenge nopaꞌarimaing, eeꞌnoko kavo mmauꞌpoꞌnupoong-pinaꞌ otoromaing dauraronanka biikaning-koo pava-koo oovereripeuꞌ, meeꞌboraꞌ sirakamaaꞌkoo deeaꞌ. 26Teka arekeeꞌ masikaꞌ oroꞌ oo-koo berikoꞌ diiꞌ, aiꞌ narung nakaronara? Eeꞌ, tee bakei nakaronara masikung Kumponing-etaing emuꞌ ninge naurampimang diiꞌ, tee tee aaꞌnung ookara nakaronuka-koo dau basie tee. 27Aiꞌ aung eeꞌnara miruꞌui Daari Meekung-koo eeꞌ minkuari otong Kumponinge bauring temuꞌ nauvuuꞌnooꞌka aaꞌpuma,

‘Ee aung, ninge botoampaing nkaang kara-nka daꞌkoo uroꞌke tee taung maamu-antareruaing uroitaaꞌ.’
(Malakai 3:1)

28Emuꞌ ninge aaꞌdampimang diiꞌ, Jooni Minkinara tee ookara nantoong tee-koo uroꞌke pontoꞌariruꞌning-koo tee deto basi pankaing, teka ninge eeꞌ naurampimang, enang-eta deto baa tee ninge tare-koo arooꞌaravaing, bane Kumponing bakaang muuꞌkoo okiꞌnarai, teie tee Jooni puruꞌui otoaing.”

29Ookarai nantoonge eeꞌnoko taakisi nkanukai taaravauꞌnung tee. Aing teing eeꞌning Kumponing bakaang kara koontoꞌ tasiꞌpaara arooꞌaako Joonie ntong-koo minkivurira meekaꞌantavuruꞌning. 30Teka teing Boto Keperuuꞌnavitu eeꞌnoko teing boto naunuka Kumponing bakaang miruꞌ teing-koo kontevorora Joonie ntong-koo minkivuma meekaꞌanta-koo tauraꞌpariaruuꞌ. 31Teeꞌkoo Jiisuuꞌke napoꞌ aaꞌpuuꞌ, “Diiꞌ nantoong emuꞌnavarang ninge aminge pa miruꞌdampipeuꞌ? Arekeeꞌ naurampiko diiꞌka tasiꞌdaripeuꞌ diikaang aarumo? 32Diiꞌ teing toireꞌpinaꞌ oroꞌnanka baaveroma baꞌnaniai turampeemaing biiꞌka aaꞌpeema, ‘Kovi puunterorompiko konterorima neekarariarukooꞌ. Aiꞌnontuꞌmariko diiꞌ birontariarukooꞌ.’ Teeꞌ nariꞌ oorampimaung neeꞌ tokomererimaing. 33Jooni Minkinara poraiꞌnange taamang tovang uaini kerempuko konterorima aaꞌperikoꞌ, ‘Tee maꞌnaang-poꞌnung.’ 34Eeꞌnoko ning Tee Naning-naumpoꞌ Paning-etaing mora taamanama tuaamarako napoꞌ konterorima aaꞌmerimaung, ‘Aung ooveriai taamang eeꞌnoko uaini nai bauko, taakisi nkanuka eeꞌnoko niiꞌning orenge biiꞌmaikoꞌke.’ 35Teka Kumponinge avutevuꞌmuresi botomuresinaꞌ sinampuko diiꞌke bakaang matau tasiꞌperiaing.”

Teni Jiisuuꞌke Tontaꞌantavuuꞌnanie Tampaꞌ Tang Oroꞌantavuuꞌnaꞌ

36Teketaꞌ niiꞌnunge Boto Keperuuꞌnavitu-koonge Jiisuuꞌ bokuvuuꞌnung tee ninka taamanureeꞌnaang, eeꞌnoko bakanava-koo kuung tumpareta taamantoma baꞌnamparuꞌnung. 37Eeꞌnoko taꞌnimpaariiꞌnaꞌ nanie manikumai oranie temono-koonanie taaravura tee taamanuko Boto Keperuuꞌnavitu-koong bakanava-koo, duuni tampaꞌ nuuraaꞌpoꞌnaroꞌ nkavui pouꞌ. 38Eeꞌnoko teni pora Jiisuuꞌkoo damaꞌdu donkonuuꞌnung kauꞌkanooꞌke biromparama. Bakaang kauꞌ taꞌdue duuꞌpukoꞌ eeꞌnoko piuꞌukoꞌ bakaang dapoi boreꞌkoonge, eeꞌnoko kauꞌ bakaang nuunuvukoꞌ eeꞌnoko duunie sisiꞌuuꞌ tampaꞌ nuuraaꞌke. 39Emuꞌ teie Boto Keperuuꞌnavitu-koonge bokuvuuꞌnunge tee oovura baka-koo aaꞌpukoꞌ, “Aung naning nakaronara dei noruꞌupeuꞌ ani baa aremuriiꞌ manikuma kompumatomai aung, aiꞌ ani teni orani.”

40Eeꞌnoko Jiisuuꞌke bakaang noruꞌ tasiꞌpura aaꞌpuuꞌnung tee, “Saimoniꞌ, ning kapooꞌ otoꞌmemumang daꞌ nauramaꞌnaang otoing.” Eeꞌnoko teie makuꞌuma aaꞌpuuꞌ, “Aming ee, nau-anta?” 41Jiisuuꞌke aaꞌpuuꞌ, “Narung naning otokoꞌnung tee-koo kenaanka naninkai komaaru nkovuretuꞌnung. Narunge paꞌnokoꞌ daakuꞌ namikuri nkavuuꞌ, napoꞌ niiꞌnunge paꞌnokoꞌ kivora namikuri. 42Teketa tenaankai bariꞌkoo makoturearuioꞌ teie tenaanka tontaꞌantavevuretuꞌ ookaanka. Emuꞌ tenaanka-koo arera teie aaꞌnaꞌ pankaruntoompupeuꞌnaꞌ oroꞌpari?” 43Saimoniꞌke makuꞌuma aaꞌpuuꞌnung, “Tee naning baruꞌ aaꞌnaꞌ tontaꞌantaevuuꞌnung-pinaꞌ noruꞌamaang.”

Eeꞌnoko Jiisuuꞌke aaꞌpuuꞌ tee, “Dake masikaꞌ minkueing.” 44Teketaꞌ teni-aape manikuma-aape bereꞌarara Saimoniꞌ aaꞌpuuꞌnung, “Dake ee ani manikuma oovemaang? Ning aꞌ dakanava-koo tumarako dake niikaang toomo siompei ning ntong ameaꞌ kauꞌ duuꞌkoo, teka anie duuꞌmuing nkaang kauꞌ bakaang taꞌdue eeꞌnoko dapoi bakaange piuꞌmui. 45Dake napoꞌ onkeonkeꞌmema nuunumeaꞌ, teka tenang ning aꞌ kuung moinooꞌketaꞌ teni siparavaꞌ ning-koong kauꞌ nuunu-koo. 46Dake ning-koong boreꞌ duunie sisiꞌmeaꞌ, teka anie nkaang kauꞌ duunie sisiꞌmuing tampaꞌ nuuraaꞌke. 47Teeꞌkoo ninge nauramaang daꞌ: Ani bakaning orarananka mmauꞌ tontaꞌarioꞌ piaa pankaing oroꞌantavuing, teka baa tee bakaning orakaꞌ nkonanka-koo okiꞌning tontaꞌarako piaa okiꞌnooꞌ oroꞌantavumaung.”

48Tenang tee Jiisuuꞌke teni aaꞌpuuꞌ, “Dakaning orarananka tontaꞌderonsing.” 49Teketa teing teke nariꞌ taamanaakoꞌning kara tutumpariruꞌ nung biiꞌka aaꞌpaama, “Aung baa naning aaꞌnung orarananka tontaꞌukooꞌ?” 50Eeꞌnoko teie aaꞌpuuꞌnung teni manikuma, “Dakaange baitoi mooꞌduinani. Mooa ninka naniaing.”